पुसद वरुड MIDC APMC मध्ये 'काटा मारून' शेतकऱ्यांची उघड लूट; १० क्विंटलचा फरक निघाल्याने पुसद हादरले!
पुसद (विशेष प्रतिनिधी):
"बळीराजा रात्रंदिवस शेतात घाम गाळतो, तेव्हा कुठे पोतं धान्यानं भरतं. पण पुसद तालुक्यातील वरुड एमआयडीसी (MIDC) येथील शेतकरी माल विक्री केंद्रावर याच बळीराजाच्या घामावर दरोडा टाकण्याचा अत्यंत संतापजनक प्रकार आज उघडकीस आला आहे. इलेक्ट्रॉनिक काट्यावरील केवळ एका फेर-वजनात तब्बल १० क्विंटल म्हणजेच १००० किलोचा फरक समोर आल्याने शासकीय खरेदी केंद्रांवर शेतकऱ्यांची कशी पद्धतशीर लूट सुरू आहे, यावर शिक्कामोर्तब झाले आहे."
"काय आहे नेमके प्रकरण'"
?
आमटी येथील शेतकरी देवराव अप्पाराव हडगिर हे अत्यंत आशेने आपला गहू विक्रीसाठी घेऊन वरुड MIDC मधील केंद्रावर आले होते. केंद्रावरील 'डिजिटल' वजन काट्यावर त्यांच्या गव्हाचे वजन करण्यात आले. पहिल्यांदा वजन भरले ४२ क्विंटल ३५ किलो.
पण, वर्षानुवर्षे शेतीत राबणाऱ्या शेतकऱ्याला आपल्या पोत्यांचा आणि मालाचा अंदाज अचूक असतो. शेतकरी हडगिर यांना या वजनावर संशय आला. त्यांनी वजन पुन्हा करण्याची मागणी लावून धरली. जेव्हा वजन पुन्हा करण्यात आले, तेव्हा तिथे उपस्थित असलेल्या प्रत्येकाचे डोळे पांढरे झाले. दुसऱ्यांदा तेच वजन थेट ५२ क्विंटल १० किलो भरले!
विचार करा... एकाच गाडीचे, एकाच मालाचे वजन अवघ्या काही मिनिटांत १० क्विंटलने वाढते? हा तांत्रिक बिघाड कसा असू शकतो? हा थेट शेतकऱ्याच्या खिशात हात घालण्याचा प्रकार आहे!
जाब विचारताच अधिकारी पसार; 'चोर की दाढीमध्ये तण'?
हा धक्कादायक प्रकार समोर येताच केंद्रावर उपस्थित शेतकरी संतप्त झाले. त्यांनी संबंधित जबाबदार अधिकाऱ्यांना जाब विचारण्यास सुरुवात केली. मात्र, शेतकऱ्यांच्या प्रश्नांची उत्तरे देण्याऐवजी आणि आपली चूक सुधारण्याऐवजी, तेथील संबंधित अधिकारी थेट कार्यालय सोडून पळ काढला!
अधिकाऱ्यांचे हे पळपुटेपण बरेच काही सांगून जाते. जर यंत्रणेत पारदर्शकता होती, तर अधिकारी पळून का गेले? यावरूनच दाल मे कुछ काला नही, तर पूर्ण डाळच काळी असल्याचा संशय बळावला आहे. यानंतर संतापलेल्या शेतकऱ्यांनी थेट रस्त्यावर उतरून 'रस्ता रोको' आंदोलन सुरू केले.
स्वाभिमानी शेतकरी संघटना आक्रमक!
घटनेची माहिती मिळताच 'स्वाभिमानी शेतकरी संघटनेचे' पुसद तालुकाध्यक्ष प्रेमराव सरगर यांनी तात्काळ घटनास्थळी धाव घेतली आणि प्रशासनाच्या या मनमानी कारभाराचा तीव्र निषेध केला. त्यांनी या गंभीर लुटीची माहिती तात्काळ शेतकरी नेते मनिष जाधव यांना दिली असून, संपूर्ण शेतकरी संघटना आता या अन्यायाविरोधात रस्त्यावर उतरली आहे.
'परखड' सवाल: प्रशासनाचा वचक संपलाय का?
वरुड MIDC मधील या प्रकरणानंतर आता काही गंभीर प्रश्न उपस्थित होत आहेत, ज्यांची उत्तरे प्रशासनाला द्यावीच लागतील:
हा केवळ तांत्रिक बिघाड की मोठा घोटाळा?
१०-२० किलोचा फरक हा तांत्रिक बिघाड असू शकतो, पण १० क्विंटलचा फरक हा तांत्रिक बिघाड असूच शकत नाही. यापूर्वी अशा प्रकारे किती शेतकऱ्यांची फसवणूक झाली आहे? याची चौकशी कोण करणार?
अधिकारी पाठीशी कुणाला घालतायत?
शेतकऱ्यांनी जाब विचारताच पळून जाणारे अधिकारी कुणाचे हित सांभाळत आहेत? त्यांना पाठीशी घालणारे 'वरदहस्त' कुणाचे आहेत?
वजन मापे विभागाचे दुर्लक्ष का?
शासकीय केंद्रांवरील वजन काट्यांचे 'कॅलिब्रेशन' आणि तपासणी करण्याची जबाबदारी असलेल्या वजन-मापे विभागाचे अधिकारी एसी केबिनमधून बाहेर पडणार आहेत की नाही?
'परखड न्यूज'चा इशारा आणि मागणी:
शेतकऱ्यांच्या गव्हाचे वजन चोरणारा हा 'काटा' नसून शेतकऱ्यांच्या नशिबावर मारलेला 'दरोडा' आहे. आज एका जागृत शेतकऱ्यामुळे हा प्रकार उघडकीस आला, पण रोज अशा केंद्रांवरून हजारो क्विंटल धान्य गरीब शेतकरी आणतात, त्यांचे काय?
आमची स्पष्ट मागणी आहे:
पळून गेलेल्या आणि या लुटीला जबाबदार असणाऱ्या अधिकाऱ्यांवर तात्काळ निलंबनाची कारवाई झाली पाहिजे.
वरुड MIDC केंद्रावरील वजन काट्याची तात्काळ फॉरेन्सिक आणि शासकीय तपासणी करून संबंधित ठेकेदारावर फौजदारी गुन्हा दाखल झाला पाहिजे.
यापूर्वी झालेल्या सर्व खरेदीच्या वजनाची पुनर्तपासणी व्हावी.
"शेतकऱ्याच्या मालाला भाव नाही आणि जो माल आहे त्याचे वजनही जर हे अधिकारी चोरणार असतील, तर शेतकऱ्याने जगायचे कसे? आता संपूर्ण पुसद तालुक्याचे लक्ष प्रशासनाच्या भूमिकेकडे लागले आहे. जर चोरांवर तात्काळ कारवाई झाली नाही, तर हा भडका संपूर्ण जिल्ह्यात उडाल्याशिवाय राहणार नाही!"
Post a Comment